A federación de Asociacións de Vecinos de Lugo, presidida por Jesús Vázquez , dispón xa de máis de 300 hortos no cinto verde de Lugo logo de acondicionar este ano 40 parcelas máis. En total, suman un quilómetro de hortos que se estenden desde a Ponte Romai ata A Tolda.
«Estamos reducindo a lista de espera porque pareciamos o Sergas. Na Ponte Romai, hai 50 hortos e na Tolda, 235. Este ano aumentamos 40 hortos máis ata O Rato», explica Jesús Vázquez.
As parcelas miden entre 20 e 25 metros cadrados e a súa utilización é gratuíta, do mesmo xeito que o uso de compost, ferramentas e plantas. O programa, posto en marcha pola Deputación hai case unha década, tamén ofrece servizo de asesoramento gratuíto a través de monitores. Entre os usuarios destes hortos, hai moitos funcionarios así como inmigrantes (especialmente, latinoamericanos procedentes de Ecuador e Bolivia) e integrantes de distintas asociacións rehabilitadoras.
Todos os interesados en participar nestes hortos poden apuntarse chamando á Deputación ou ben á federación veciñal ao número 982 203721.
Este colectivo celebrará proximamente unha xornada de degustación dos produtos cultivados nos hortos así como o Día da Flor.
De cara ao outono, a produción centrarase, sobre todo, no invernadoiro. Ademais, haberá varios cursos de horticultura e floricultura. Tamén se aproveitarán as casetas de madeira próximas aos hortos «como centros sociais, xa que alí servimos café e temos varios xogos como xadrez, por exemplo», di Vázquez.
