A Deputación de Lugo financiará a sinalización do patrimonio histórico e cultural incluído na reserva dos Ancares na provincia. Así o ratificou este martes en presidente provincial, Darío Campos, que presidiu en Cervantes a reunión dos órganos de xestión da Reserva da Biosfera dos Ancares.
O proxecto de sinalización permitirá a posta en valor dos recursos patrimoniais dos municipios dos Ancares, aumentando a súa visibilidade e difusión.
Así, no Concello de Becerreá sinalizarase o Dolmen de Vilouta, o Castro de Cantiz, as igrexas de Penamaior e San Pedro de Cadoalla e as pontes de Gatín e de Cruzul; mentres que en Cervantes sinalizarase a necrópole megalítica de Pena dos Mouros, os petróglifos de Campa do Barreiro, o castro de Santa María, o Castelo de Doiras, o Pazo de Quindous e a Igrexa de Donís.
Finalmente, no Concello de Navia de Suarna sinalizarase a mámoa de Ferreirúas, a ponte e o castelo da Pobra de Navia e os castros de Cantón, Cabela e Pin.
Durante este encontro tamén se fixo oficial a incorporación de cinco novos colectivos ao órgano de participación, a Asociación de Mulleres Rurais Ledicia de Navia, a Anpa do CPI de Cervantes, a Asociación de Mulleres Alecrín de Cervantes, a Anpa do CEIP San Xoán de Becerreá e a asociación Patrimonio dous Ancares.
Finalmente, presentouse a programación de actividades para o primeiro trimestre de 2017, accións de carácter gratuíto e para todas as idades coas que se dará a coñecer a riqueza natural da zona -talleres, rutas, xornadas e cursos para nenos, entre outras actividades-.
A Deputación de Lugo sinalizará o patrimonio cultural dos Ancares
O proxecto permitirá pór en valor e aumentar a visibilidade dos recursos patrimoniais de Becerreá, Cervantes e Navia de Suarna
Xogador do Folgueiro
Óscar Pérez Meitín marcou de penalti e no desconto para lograr a vitoria
21/abr./24
