A defensa de García Adán reitera que ''hai probas dabondo de que todas as imputacións son falsas''

O avogado que exerce a defensa do principal imputado na Operación Carioca, José Manuel García Adán, no proceso que se segue contra el polo suposto maltrato e agresións sexuais á que foi a súa esposa, dixo que non aceptará "ningunha das múltiples imputacións" ás que o seu cliente se enfronta neste xuízo.

Insistiu, en declaracións aos informadores, en que "hai probas máis que dabondo de que todas as imputacións que se lle fixeron son falsas" e indicou que a declaración da filla menor do seu patrocinado este luns, a porta pechada, así o corrobora.

Aínda que este letrado estivo presente na mesma, non entrou en detalles, e limitouse a comentar que o testemuño da nena reforza os seus argumentos: "Co resultado de onte, desde logo si".

O primeiro en prestar declaración este martes será o propio García Adán e a continuación a presunta vítima, á que seguirán unha trintena de testemuñas, entre eles varios axentes das forzas e corpos de seguridade do Estado.

Está previsto que o xuízo se prolongue ata o xoves -día 24 de abril-, despois de que onte mesmo prestase declaración a porta pechada, antes do inicio da vista oral na Audiencia Provincial, a filla do acusado, menor de idade.

O avogado que se fixo cargo da defensa de García Adán xa confirmou aos medios de comunicación, ás portas da Audiencia Provincial de Lugo, que pedirá a libre absolución do seu cliente, porque sostén que as imputacións contra el son falsas" e intentará "demostralo no xuízo".

Pola súa banda, o fiscal impútalle a García Adán delitos continuados de agresión sexual e ameazas, así como detención ilegal, malos tratos e violencia habitual, polos que pide para el unha pena de 27 anos de prisión e unha indemnización de 50.000 euros para a suposta vítima.

García Adán estivo en prisión provisional por esta causa durante dous anos e medio e, máis tarde, regresou ao cárcere pola súa imputación na chamada Operación Carioca, aínda que volveu quedar en liberdade e agora reside fóra de Lugo, dado que a xuíza instrutora, Pilar de Lara, impúxolle o desterro de Galicia.

A Operación Carioca, que instrúe o Xulgado de Instrución Número 1 de Lugo, foi dirixida pola xuíza instrutora Pilar de Lara para desmantelar unha suposta trama de prostitución na que foron imputados varios axentes dos Corpos e Forzas de Seguridade do Estado.