A declaración da Infanta será seguida por 300 xornalistas

Uns 300 xornalistas de 79 medios de comunicación solicitaron acreditación para cubrir a declaración da infanta Cristina como imputada no caso Nóos o vindeiro sábado nos xulgados de Palma.

Medios locais, nacionais e internacionais acreditáronse para informar da comparecencia da duquesa de Palma, segundo os datos do gabinete de prensa do Tribunal Superior de Xustiza das Illas Baleares (TSJIB), que pechou hoxe o prazo para emitir credenciais.

Entre os medios acreditados figuran as grandes axencias e xornais nacionais e internacionais, emisoras de radio, medios dixitais, Televisión Española e canles de Portugal, Francia, Alemaña e Suíza, a CNN estadounidense, Televisa de México, a canle árabe Al Jazeera e ata a televisión pública iraniana.

As dependencias xudiciais de Vía Alemania estarán pechadas ao público ao ser sábado, polo que os xornalistas non poderán acceder ao interior do edificio, pero disporán dun espazo habilitado no aparcadoiro, ao final da rampla pola que se accede ao xulgado de garda os fins de semana e festivos.

Só dúas persoas por medio poderán acceder ao aparcadoiro, de maneira que como máximo haberá uns 160 informadores no patio. O resto dos acreditados deberán cubrir a información desde os exteriores das dependencias xudiciais.

De cara á comparecencia da infanta no caso Nóos, o primeiro que estableceu o xuíz decano de Palma, Francisco Martínez Espiñenta, foron os criterios de regulación para a prensa.

O decano celebrou hoxe un novo encontro con representantes da Policía Nacional para terminar de perfilar as cuestións relativas á seguridade.

O pasado venres decidiu autorizar á infanta a acceder aos xulgados en vehículo de xeito excepcional e por estritas razóns de seguridade.

A decisión baseouse no plan de seguridade elaborado pola Policía Nacional, que consideraba absolutamente recomendable e estritamente necesario adoptar esta medida para poder garantir un nivel de seguridade adecuado, dada a topografía das rutas de entrada e saída inadecuadas do edificio, a expectación e a "previsión efectiva de grupos hostís e con gran repercusión en redes sociais e nun clima de tensión social"