No mundo da pasarela é habitual ouvir que as modas sempre volven. Por iso, quizais as mulleres casadeiras tiveron onte unha boa oportunidade de ver as tendencias da moda nupcial que poden atoparse dentro duns poucos anos se se achegaron ao particular desfile que se celebrou na localidade chairega de Muimenta.
As asociacións locais Xotramu e Aquilino Iglesia Alvariño volveron ser as promotoras, por quinto ano, da recreación dunha feira de época, concretamente da década dos 50.
En cada edición, que coincide co martes de Entroido, o programa de actividades conta con algunha novidade, que nesta ocasión foi organizar unha pasarela pola que pasaron ao redor de 40 modelos con vestidos de noiva e de comuñón desa época.
