A comisión de seguimento da candidatura que se quere presentar ante a Unesco para que a Ribeira Sacra sexa Patrimonio da Humanidade ou Ben Mundial ten un primeiro mapa orientativo do territorio que debería entrar na mencionada área de protección. A proposta foi presentada onte no marco dunha reunión celebrada en Monforte e nese mapa establécese que serán obxecto da candidatura aquelas parroquias das provincias de Lugo e Ourense que teñan ribeira directamente sobre o Miño ou o Sil e aqueles elementos monumentais que poidan estar fóra desa ribeira pero que xa teñan unha declaración de BIC (Ben de Interese Cultural) previa.
A proposta partiu dos representantes do Valedor do Pobo e da Dirección Xeral de Patrimonio e aínda que non quedou completamente pechada e desde a secretaría da comisión non se quixo profundar en máis detalles «porque é un borrador pendente de estudar mellor», supón unha restrición do territorio sobre a idea inicial na que se incluíron os 21 municipios das dúas provincias que integran o consorcio turístico e a denominación de orixe Ribeira Sacra con todos os seus territorios.
A A-76 non encaixa no Patrimonio da Humanidade
A plataforma en contra da A-76 considera que a autovía non encaixa nun territorio que aspira a ser Patrimonio da Humanidade. Di que o trazado é un atentado contra o seu pobo en concreto pero contra toda a Ribeira Sacra. A asociación denuncia que se destruirán parte das ribeiras do río e que iso implicará acabar coa paisaxe propia da Ribeira Sacra. Defende que a A-76 agrede a contorna da Capela da Costria, un muíño e unha zona encañonada sobre o Miño denominada A Pereira. Ademais, divide o pobo en dous partes con pontes e túneles. «É como se na Praza España de Monforte se constrúe un túnel para unha autovía», argumentaron onte durante a protesta.
