A Autovía do Cantábrico (A-8) quedou reaberta ao tráfico este martes logo de máis dun día pechada en ambos os sentidos da circulación entre os municipios de Mondoñedo e Abadín, por mor dos densos bancos de néboa que dificultaban a visibilidade e condicionaban a seguridade dos propios usuarios.
Segundo informou o Subsector de Tráfico da Garda Civil de Lugo, a autovía permaneceu pechada ao tráfico no Alto do Fiouco, entre os puntos quilométricos 536 e 552, desde as 02:25 horas do pasado día 12 e as 11.29 horas deste martes.
De momento, o nivel de servizo continúa sendo vermello e a circulación "difícil" por mor da néboa que se acumula nese punto. Cando a escasa visibilidade obriga a pechar a autovía, habilítanse desvíos alternativos a través da estrada Nacional 634.
Reabre a A-8 no Fiouco tras máis dun día pechada
A circulación é de nivel "vermello" pola néboa