O secretario de Estado de EE.UU., John Kerry, afirmou este luns que os venezolanos expresaron o seu "abafador desexo de cambio" nas eleccións lexislativas deste domingo e pediu que agora se estableza un diálogo entre todas as partes.
"Os votantes venezolanos expresaron o seu abafador desexo de cambio na dirección do seu país", asegurou Kerry nun breve comunicado en referencia ao triunfo da oposición.
O secretario de Estado indicou, ademais, que "o diálogo entre todas as partes en Venezuela é necesario para encarar os desafíos sociais e económicos que afronta o país". "Estados Unidos está disposto a apoiar ese diálogo xunto con outros na comunidade internacional", agregou o xefe da diplomacia estadounidense.
Kerry aproveitou tamén a ocasión para "felicitar ao pobo de Venezuela por facer ouvir as súas voces de modo pacífico e democrático". "Urximos ás autoridades electorais venezolanas a que continúen publicando os resultados de voto de xeito oportuno e transparente", concluíu o titular de Exteriores estadounidense.
Venezuela e Estados Unidos atópanse sen representación diplomática a nivel de embaixadores desde 2010 e, desde entón, as relacións pasaron por varias etapas de fortes desencontros.
LATINOAMÉRICA. Cuba quixo mandar o seu apoio a Maduro, mentres que Uruaguay, Panamá, O Salvador e México quixeron felicitar a Venezuela por "o civismo" no que transcorreron as eleccións.
O presidente cubano, Raúl Castro, enviou este luns unha mensaxe de apoio ao seu homólogo venezolano, Nicolás Maduro. Nunha breve mensaxe publicada no diario oficial cubano Granma, Castro dille a Maduro que "estaremos sempre xunto a vostedes".
"Seguín, minuto a minuto, a extraordinaria batalla que deron e escoitei con admiración as túas palabras", recalca o presidente cubano. "Estou seguro de que virán novas vitorias da Revolución Bolivariana e Chavista baixo a túa dirección. Estaremos sempre xunto a vostedes", reitera Castro, antes de enviarlle "un abrazo".
Tamén se pronunciou o chanceler uruguaio, Rodolfo Nin Novoa, dixo que os cidadáns de Venezuela "optaron" por abrir "unha época de cambio" que Uruguai respecta, como respectaría "outro resultado".
Nin Novoa quixo destacar a tranquilidade coa que se celebraron as votacións: "me congratulo de que Venezuela realice esta xornada electoral con absoluta calma, normalidade e dando tamén un exemplo, como deu Arxentina (...), e como habitualmente estamos afeitos esperar dos países suramericanos", argumentou.
Unha mensaxe ao que se uniron os representantes de México, Panamá e o Salvador que subliñaron "o civismo" das eleccións venezolanas.
