Kendrick Lamar triunfa nos MTV Vídeo Music Awards

O rapeiro estadounidense Kendrick Lamar triunfou este domingo nos premios MTV Vídeo Music Awards (VMA), que se celebraron no Fórum de Los Ángeles, ao levar cinco figuras, incluíndo o cobizado galardón ao mellor clip do ano polo seu tema HUMBLE.

Lamar, en imparable ascenso grazas ao seu último álbum DAMN. (2017), levou tamén os premios aos mellores efectos especiais, a mellor dirección artística, a mellor dirección e o mellor vídeo de hip-hop, todos eles por HUMBLE..

Tan só lle faltou unha guinda para rematar unha noite ideal xa que o británico Ed Sheeran arrebatoulle o galardón ao mellor artista do ano, unha das novidades desta edición, pois por primeira vez os premios VMA non separaron a homes e mulleres en dúas categorías diferentes. No seu discurso de agradecemento ao anotarse o galardón ao mellor clip do ano, Lamar destacou que el non sería nada sen o seu equipo.

Doutra banda, Khalid levou o premio ao mellor novo artista, Zayn e Taylor Swift obtiveron o galardón á mellor colaboración por I Don't Wanna Live Forever, Kanye West gañou o recoñecemento á mellor coreografía por Fade, e Zedd e Alessia Cara impuxéronse na categoría de mellor vídeo de dance con Stay.

Así mesmo, Fifth Harmony e Gucci Mane gañaron o VMA ao mellor vídeo pop por Down, mentres que Lil Uzi Vert levou o premio á mellor canción do verán por XO Tour Llif3 ao derrotar ao remix de Despacito a cargo de Luís Fonsi, Daddy Yankee e Justin Bieber.

Esta derrota de Despacito chega despois de que nas redes sociais houbese certa controversia pola súa ausencia nas categorías reinas dos premios VMA cando se trata dun éxito mundial da música que bateu a marca de visitas en Youtube para un vídeo de calquera tipo.