A monfortina Julia Otero recibe o Premio Alonso Vicedo de Comunicación

A galega Julia Otero (Monforte de Lemos, 1959) recibiu este mércores pola noite o XVIII Premio de Comunicación Manuel Alonso Vicedo, distinción que entregan cada ano a Diputación de Sevilla e o Concello de Gerena en recordo do xornalista que dá nome ao galardón, exdirector de Radio Sevilla Cadena SER e gañador de catro premios Ondas, a pesar de falecer novo, aos 33 anos, nun accidente de tráfico. A homenaxeada foi presentada no acto de entrega por Fernando Iwasaki, colaborador do seu programa en Onda Cero, Julia en la Onda, que entendeu que se trata dun recoñecemento que "non só galardoa a unha extraordinaria profesional, senón a unha forma exemplar de exercer a súa profesión".

"Unha profesional comprometida coa sociedade, que soubo desenvolver como pouca a arte da entrevista", dixo na súa alocución o alcalde de Gerena, Javier Fernández, que se felicitou de que o premio sexa, na actualidade, "un dos máis importantes de comunicación de España".

No seu discurso de agradecemento, Julia Otero recoñeceu que sempre que recibe un premio ten un especial recordo para o seu avó, Manuel, un campesiño galego do que recordou que cando a viu por primeira vez en televisión, en 1988 no programa 3x4, díxolle: "Tanto estudar para isto", algo que, engadiu, transmitiulle un punto de humildade que sempre me acompañou".

A xornalista monfortina asegurou que, para dedicarse á comunicación, "ten que gustarche a xente", e considerou que "a patria son as persoas que queres; polo que a xente, as súas historias, saber o que esperan de ti, é a base da comunicación".

Sobre o conflito catalán, chamou a atención da dificultade que entraña "vivir en Barcelona e traballar para toda España", apelando aos xornalistas a "dar mensaxes balsámicos, tender pontes, aínda que todos sabemos que, nas guerras, o primeiro que voa son as pontes", explicou ante o medio milleiro de persoas congregadas para ver en vivo a entrega do galardón.

A lista de representantes dos medios de comunicación que recibiron este premio a forman, entre outros, Iñaki Gabilondo, José Antonio Sánchez Araujo, Tom Martín Benítez, Jesús Quintero, María Esperanza Sánchez, Lorenzo Milá, Ana Rosa Quintana, Matías Prats, Ana Blanco, Rosa María Calaf, Gemma Nierga, María Teresa Campos, Ezequiel Martínez, Pepa Bo, Javier Gutiérrez e a RTVA pola seu 25 aniversario, e El Gran Wyoming. Todos eles recibiron persoalmente nun acto celebrado en Gerena a escultura do artista local Antonio Polo, que é o símbolo oficial do Premio Manuel Alonso Vicedo.