Orozco pedirá o arquivo do caso Garañón despois de que Besteiro declare

O avogado Gregorio Arroyo, que se ocupa da defensa do exalcalde de Lugo no chamado caso Garañón,  informou de que a petición de sobresemento da causa, polo menos no que se refire ao seu patrocinado, terá que esperar a que se produza a declaración como imputado do secretario xeral dos socialistas galegos, José Ramón Gómez Besteiro.

En declaracións a Efe, Arroyo afirmou que se trata dunha cuestión de "rigor procesual", tendo en conta de que Gómez Besteiro foi citado para prestar declaración o día 12 de xaneiro.

"O alcalde está á marxe de calquera tipo de imputación, sospeita ou indicio de clase algunha", precisou o avogado defensor, pero "non cabe dúbida de que hai unha declaración pendente, que é a do señor Besteiro, e hai que esperar".

En calquera caso, Gregorio Arroyo subliñou que nesta causa tampouco "hai nada" contra o exalcalde de Lugo, "como veu ocorrendo en todas as causas", ata catro, nas que José López Orozco fora imputado e que foron finalmente arquivadas.

En canto ao feito de que o alcalde fose citado inicialmente pola xuíza instrutora para declarar por varios delitos e, finalmente, comparecese unicamente por un, contra a ordenación do territorio, o letrado de López Orozco opina que "foi reducindo" porque lle falta material na instrución".