Israel chama á súa delegación en Exipto e o diálogo colapsa ao romper a tregua

O lanzamento de tres foguetes por parte das milicias palestinas contra o sur de Israel e a resposta bélica deste país colapsaron hoxe o diálogo en busca dun cesamento do fogo permanente que se celebraba no Cairo.

Segundo o diario Haaretz, nada máis coñecerse os disparos, o primeiro ministro israelí, Benjamin Netanyahu, ordenou á delegación que desde hai días negocia na capital exipcia que regrese ao país.

"Fontes do Goberno dixeron que as negociacións sobre a tregua no Cairo colapsaron e que, tras o lanzamento de foguetes desde Gaza, o primeiro ministro e o ministro de Defensa, (Moshe Yaalon) ordenaron á delegación israelí regresar ao país", afirmou o rotativo.

Á primeira hora da tarde, proxectís lanzados desde a Franxa caeron en senllos escampados próximos á cidade de Beersheva, a máis poboada do sur de Israel, sen causar nin danos nin vítimas, informou o Exército israelí nun comunicado.

Confirmou que as forzas israelís responderan á agresión, aínda que sen especificar de que xeito e en que lugares da asediada Franxa.

Fontes palestinas en Gaza indicaron, pola súa banda, que avións de combate israelís bombardearon zonas agrícolas na localidade setentrional de Beit Lahia e outras áreas do norte da Franxa e acusaron a Israel de ser o que rompeu a tregua.

Comentarios