Unha coidadora do asilo de San Roque, investigada por furtar xoias a anciáns

Unha coidadora de 36 anos foi imputada como investigada por varios delitos de furto perpetrados no asilo das Relixiosas Hermanitas dos Anciáns Desamparados, en Lugo, despois de que realizase ata 21 transaccións de venda de xoias, en apenas tres meses, por un valor próximo aos 5.000 euros. A investigación comezou a mediados de agosto, cando a neta dunha señora de 96 anos, ingresada na residencia de San Roque, presentou denuncia na Comisaría Provincial ao decatarse de que, durante unha visita á súa avoa, a anciá non levaba postas as súas xoias.

Ao preguntar ás monxas, fixéronlle saber que se decataron da falta e comentáronlle que non era a primeira vez que sucedía isto, porque outros anciáns foran vítimas de situacións similares. As pescudas realizadas levaron aos investigadores a centrar a súa atención nunha traballadora do asilo que, nun curto período de tempo, realizara ata 21 vendas de xoias no mesmo establecemento.

Posteriormente, os axentes foron contactando cos familiares dos anciáns afectados para que recoñecesen os efectos recuperados, entre os que figuran pulseiras, cadeas, medallas, pendentes e colgantes. En total, son máis de 15 os afectados, pero case todos recuperaron as xoias furtadas.

A investigada, que empezara a traballar no asilo en outubro de 2016, recoñeceu ser a autora dos furtos, de modo que o grupo de roubos da Policía Xudicial remitiu as dilixencias da investigación ao xulgado de garda.