Indignación polo corte e as colas na A-8, que volveu pechar pola néboa

O Alto do Fiouco da Autovía do Cantábrico (A-8) apenas permaneceu este luns aberto oito horas polo día, volveu pechar unha hora e media pola noite e reabriu de novo cara ás dez e media, sen que ao peche desta edición se tivera claro que ocorrería de madrugada. Os usuarios da infraestrutura fixeron chegar ao Facebook do Progreso A Mariña os seus comentarios a modo de queixa polas colas quilométricas que se formaron a tarde do domingo na N-634, desde Lourenzá a Abadín, en pleno regreso das praias e o traxecto cortado de novo pola néboa.

"Subscríboo. Tocoume sufrir a caravana ata pasar de Abadín! Non entendo nada. Fíxose a autovia para evitar A Xesta, e cando hai problemas, xusto ese tramo é o que tes que pasar SÍ ou SÍ!", lamenta unha veciña de Lugo, nun dos comentarios recibidos na rede social do Progreso A Mariña. "Nai miña a que se leou", comenta outra veciña de Mondoñedo. Unha vilalbesa matizaba: "Esa autovía está feita por encima da montaña. Por que non a fixeron máis abaixo? Para que están os que a deseñan? E cando fai moito vento, lévate o coche para o outro carril ou contra o valo", denuncia. Outro internauta sinala: "As autovías fanse para desconxestionar o tráfico e esta en concreto fai ese labor pero ao contrario. De pena".

"Que desastre" ou "isto é xa de vergoña" comezan a ser frases recorrentes por parte dos usuarios con respecto aos peches do tramo da A-8 que salva Mondoñedo. Prevese que o problema circulatorio se repita ou incluso se agrave durante os fins de semana coas festas, se hai néboa.