Ibrahimovic regresa ao Manchester United cun contrato dunha tempada

O Manchester United oficializou este xoves o regreso ao club do dianteiro sueco Zlatan Ibrahimovic por unha tempada e confirmou que lucirá o dorsal número 10.

Ibrahimovic, de 35 anos, defendeu as cores do United o pasado ano, nunha campaña na que disputou 46 partidos, marcou 28 goles e levantou tres títulos: a liga Europa, a Copa da liga (EFL Cup) e a Community Shield. "O Manchester United está encantado de anunciar que Zlatan Ibrahimovic regresa ao noso club e que asinou un contrato por unha tempada. Levará o número 10", informou o equipo adestrado por José Mourinho a través dun comunicado.

O futbolista sueco, exxogador de Ajax, Juventus, Inter, Milán, Barcelona e PSG, sufriu na recta final do pasado curso unha rotura do ligamento cruzado da perna, que o mantivo afastado dos terreos de xogo durante os últimos meses. "Estou de volta para acabar o que empecei. A miña intención e a do club sempre foi que continuase aquí, e estou a desexar volver pisar o céspede de Old Trafford", asegurou Zlatan na misiva.

"Con todo, sei que teño que ir aos poucos para estar recuperado ao cento por cento. Traballei moi duro e seguireino facendo para asegurarme de que estou nas mellores condicións posibles no meu regreso", engadiu o lendario xogador escandinavo.

Ibrahimovic, que podería empezar a ter minutos a partir do mes de decembro, renunciou ao seu salario durante o tempo de inactividade no club e desvinculouse do United o pasado 30 de xuño.

"Estamos encantados de que Zlatan se siga recuperando e felices de poder contar coa súa experiencia e ambición. Despois da súa gran contribución o pasado ano merécese toda a nosa confianza, e seremos pacientes e esperarémolo para que regrese. Non teño ningunha dúbida de que será unha peza moi importante na segunda metade de tempada", sinalou Mourinho, adestrador dos Diaños Vermellos.