O agrarismo galego é un dos movementos que conforman a identidade da historia rural da comarca chairega e doutros tantos recunchos da estensa xeografía desta terra. A principios do século XX proliferaron de forma constante agrupacións e sindicatos agrícolas que loitaron contra o sistema foral e o caciquismo, ademais de promover a renovación técnica do sector agrario en Galicia.
Un destes sindicatos de carácter católico que loitou por redimir ao campesiño da súa precaria situación foi o fundado en 1919 na parroquia begontina de Gaibor e do que dá boa conta o escritor e mestre David Corral na súa obra ‘Sindicato Agrícola Católico de Gaibor 1919-1942’.
