O inglés Lewis Hamilton (Mercedes) gañou o Gran Premio de Malaisia, a segunda proba do Mundial de Fórmula Un, que se disputou hoxe no circuíto de Sepang e no que o español Fernando Alonso (Ferrari) acabou en cuarta posición.
Hamilton, campión do mundo en 2008 saíu desde a 'pole' e marcou a volta rápida, e impúxose con autoridade, por diante dos alemáns Nico Rosberg -o seu compañeiro en Mercedes, que segue liderando o campionato- e Sebastian Vettel (Red Bull), cuádruplo campión mundial, que foron segundo e terceiro, respectivamente, e acompañárono no podio.
O inglés logrou a vixésima terceira vitoria da súa carreira en Fórmula Un ao cubrir o percorrido, de 310,4 quilómetros, nun tempo gañador dunha hora, 40 minutos, 25 segundos e 974 milésimas; e gañou con 17 segundos de vantaxe respecto de Rosberg e 24 sobre Vettel.
Alonso, que saíra cuarto, acabou en idéntica posición e repetiu o resultado logrado hai dúas semanas na primeira carreira, o Gran Premio de Australia.
Quinto foi outro alemán, Nico Hülkenberg (Force India), por diante do inglés Jenson Button (McLaren) e dos dous pilotos de Williams, o brasileiro Felipe Massa e o finlandés Valtteri Bottas, que concluíron sétimo e oitavo, respectivamente.
Tamén entraron nos puntos dous debutantes, o danés Kevin Magnussen (McLaren) e o ruso Daniil Kvyat (Toro Rosso), que acabaron noveno e décimo.
Rosberg, gañador en Australia, segue liderando o Mundial, agora con 43 puntos, 18 máis que Hamilton e con 19 sobre Alonso, que é terceiro no campionato.
A próxima proba, o Gran Premio de Baréin, disputarase o vindeiro domingo no circuíto de Sakhir.
Dianteiro do Friol
Daniel Roca Couso marcou un hat trick ante o Carballedo nun avultado marcador
17/abr./24
