Garzón di que o TS ''elimina toda posibilidade de investigar a corrupción''

O xuíz Baltasar Garzón rexeitou "frontalmente" a condena a once anos de inhabilitación que lle impuxo o Tribunal Supremo por ordenar as escoitas do "caso Gürtel" e anunciou que recorrerá a sentenza que, ao seu xuízo, "elimina toda posibilidade de investigar a corrupción".

Nunha nota remitida aos medios de comunicación, Garzón asegura que a sentenza non está sustentada en probas nin razóns xurídicas e que "elimina toda posibilidade para investigar a corrupción e os seus delitos asociados abrindo espazos de impunidade e contribúe gravemente, no afán de acabar cun concreto xuíz, a laminar a independencia dos xuíces en España". Garzon denuncia que a sentenza non se axusta a dereito, que lle condena de forma inxusta e predeterminada e subliña que ao longo de toda a súa carreira cumpriu sempre con rigor as normas e defendeu os dereitos dos justiciables e das vítimas en situacións moi adversas.

"Traballei contra o terrorismo, o narcotráfico, os crimes contra a humanidade e a corrupción. Fíxeno sempre coa lei na man e en unión de fiscais, xuíces e policía", asegura. A isto engade que a súa actuación no "caso Gürtel" axustouse á lei e que tomou todas as medidas legais para garantir o dereito de defensa e a investigación de delitos moi graves relacionados coa corrupción, partindo de contundentes indicios e para evitar "a continuidade delituosa de branqueo de diñeiro dos xefes mafiosos que utilizaban, como fixeran antes, aos avogados".

GARZÓN RECORRERÁ
Tras denunciar que se lle impediu achegar as probas que o demostraban e que o Supremo prescindiu da implicación e participación dos avogados na trama "Gürtel", Garzón anuncia que acudirá ás vías legais que correspondan "para combater" a sentenza e que exercerá todas as accións pertinentes "para tratar de paliar o prexuízo irreparable que os autores" da mesma cometeron. Segundo Garzón, ao longo do procedemento, violentáronse os seus dereitos sistematicamente, as súas peticións de defensa foron desatendidas e o xuízo oral unha escusa, cuxo contido foi utilizado só contra el "para poder dar forma a unha sentenza que xa estaba anunciada desde hai meses".

Así mesmo, cualifica como unha aberración que a resolución para xustificar a condena explique que o feito de que Garzón, no auto no que ordenou intervir as comunicacións dos imputados no "caso Gürtel" en prisión e os seus avogados, incluíse unha cláusula para facer prevalecer o dereito de defensa revela que sabía que a súa resolución afectaba a ese dereito. "A sentenza non di en ningún momento cal é o dano producido no dereito de defensa e non o di, sinxelamente, porque non existe. Invéntao", resalta.