O alcalde de Samos, o socialista Xullo Gallego, espera que o museo que se prepara na abadía benedictina poida abrir as súas portas ao público antes do verán. Para iso é necesario crear previamente unha fundación, da que formarán parte representantes do Concello e do mosteiro, asunto este que se abordará mañá nun pleno ordinario.
A sesión, convocada para as 13.00 horas, servirá para facultar ao alcalde para que designe a tres persoas para a fundación. A comunidade benedictina nomeará a outros tres membros e, entre os seis, distribuiranse os cargos e estudarán os estatutos. Estes serán levados de novo a un pleno para a súa aprobación e posterior rexistro ante notario. Tamén serán presentados ante a Xunta.
