Francisco: "Se nós estamos ben; o Numancia, tamén"

Francisco Rodríguez, adestrador do CD Lugo, eloxiou este venres ao seu próximo rival, o Numancia, ao que se enfrontará o domingo no Ángel Carro, e explicou que ambos os conxuntos chegan á cita en "boa dinámica" aínda que, no seu caso, tras unha derrota en Oviedo (3-2), que lles impediu seguir como líderes en solitario de LaLiga 1/2/3. "Non vai ser fácil. O Numancia vén de gañar un partido difícil na casa co Alcorcón e está a un punto de nós. Polo tanto, se nós estamos nunha boa dinámica, eles tamén o están. Son un moi bo equipo, que fai moi ben as cousas e fóra da casa quizá non coñecía a vitoria, pero conseguiu puntuar en campos difíciles", comentou en rolda de prensa.

O técnico branquivermello expresou a súa confianza en manter "o rendemento na casa", onde está "a facer moi ben as cousas e conseguindo resultados positivos". O preparador almeriense fixo fincapé na regularidade que están a ter o Lugo e o Numancia esta tempada. "É o máis importante en Segunda División. Todos os equipos que queiran estar cómodos ou nunha situación privilexiada, ten que ser así. Porque non temos a capacidade que poden ter Osasuna, Sporting de Xixón ou Granada. Nós temos que depender de ser regulares, de confiar moito no equilibrio defensivo e ofensivo e niso nos baseamos", dixo.

Engadiu que "a diferenza vai estar en que un xogador faga goles" e lles dea "ese salto" que lles fai "falta a moitos dos equipos que están na pelexa" por ascender a Primeira División.

Do Numancia indicou tamén que "é un equipo vertical, que en campo contrario acumula moita xente" e citou a Manu del Moral, Pere Milla e Valcarce. "É un equipo que nos vai obrigar a centrar moi ben os nosos obxectivos e a traballar, como vimos facéndoo, sen balón e con balón. Tamén temos que volver mirarnos a nós mesmos, ser protagonistas no noso estadio e que se preocupen tamén eles de nós, sempre con todo o respecto, porque ao final é un moi bo equipo", opinou.

Respecto do seu equipo, indicou que tanto en Valladolid (2-2) como en Oviedo, os seus xogadores tomaron "decisións quizais equivocadas", como "meter a perna cando non se debe" e cometer penalti, aínda que matizou que no caso do Carlos Tartiere, os seus pupilos foron "superiores ao rival no 80% do partido". "Gañamos en todo, en posesión, en crear superioridades en campo contrario e no apartado defensivo, pero iso non nos valeu para gañar e por iso esta semana volvemos traballar duro, volvemos incidir en aspectos con balón e en finalización, que é o que nos está faltando un pouquiño", expuxo.

"Se tivésemos un dianteiro agora mesmo con sete ou oito goles, teriamos tres puntos máis. Estou convencido. Pero non o temos de momento, porque eu confío plenamente nos que temos. De feito, están a ter oportunidades", abundou.

A derrota en Asturias baixou aos lucenses do primeiro ao terceiro posto aínda que cos mesmos puntos que o líder, o Granada. "Tennos que servir para non desengancharnos desa situación. Non por estar arriba, senón porque, ao final, eu creo que vai haber un grupo de equipos que estamos todos moi igualados e depende de nós mesmos seguir nesa situación. Xerarnos unhas expectativas de querer gañar o próximo partido e seguir nesa dinámica boa é o obxectivo", comentou.

Francisco eloxiou ao uruguaio Nico Albarracín, do que dixo que ten unhas "estatísticas sorprendentes" porque "xogou moi poucos minutos e deu asistencias de gol" e tivo protagonismo na execución das accións de estratexia.