O alcalde de Pol, o socialista Liño Rodríguez Onega, manterá a dedicación exclusiva e, xa que logo, o seu soldo, ao fracasar unha moción do PP grazas á suma dos tres votos do PSDEG e os dous do BNG.
O pleno extraordinario, celebrado ao mediodía deste sábado, desenvolveuse nun ambiente bronco e ante máis de 120 veciños. O PP, que conta con catro concelleiros, tamén reclamaba a retirada da dedicación exclusiva ao primeiro tenente de alcalde, José Luís Ramudo Andión.
O Bloque non desvelara o sentido do voto ata a sesión pero, a pesar das discrepancias que manteñen co Goberno local, situáronse en contra da iniciativa 'popular'.
No entanto, o seu portavoz, Xosé Manuel López Tellado, advertiu de que esta situación "non pode continuar" e deulle a PSDEG un prazo dun mes e medio —cando se cumpra un ano da investidura— para alcanzar un acordo que dea estabilidade ao concello. En calquera caso, responsabilizou, en parte, á dirección socialista da falta dun pacto.
"Non é casualidade", apuntou en declaracións a Europa Press, e esgrimiu exemplos de localidades da provincia que se atopan na mesmas ou similares circunstancias, como Portomarín, A Fonsagrada ou Castro de Rei, onde sería necesario un consenso a tres co concurso de Terra Galega.
