O presidente galego, Alberto Núñez Feijóo, trasladou as súas condolencias ás vítimas do incendio de Portugal que, ata o momento, causou 62 mortos e decenas de feridos.
A través dunha mensaxe na súa conta de Twitter, o titular da Xunta expresou o seu pesar polo acontecido no municipio de Pedrógãou Grande. "Galicia está co pobo portugués. As nosas condolencias para os familiares das vítimas do lume", reza o tuit de Feijóo, que aparece asinado coas súas iniciais "ANF".
Pola súa banda, o presidente do Goberno, Mariano Rajoy, transmitiu nun telegrama de condolencias remitido ao primeiro ministro da República Portuguesa, Antonio Costa, a fonda tristeza e a dor do Executivo e do pobo español polas vítimas do incendio en Pedrógãou Grande, no centro de Portugal.
"Quixera facerlle chegar, nestes momentos de dor, a solidariedade e as condolencias do Goberno e do pobo español polas persoas falecidas, que rogo que traslade aos seus familiares e amigos, así como os nosos mellores desexos de restablecemento para os feridos", indica o presidente español.
O telegrama expresa o convencemento de que "Portugal poderá contar con España para todo o que precise neste difícil momento".
"España, país veciño e irmán, está á beira de Portugal para cooperar nos labores de extinción do incendio, así como para apoiar ás autoridades de protección civil", engade esta comunicación.
Rajoy falou esta mañá por teléfono co primeiro ministro portugués, António Costa, a quen ofreceu o apoio e a colaboración de España ante a traxedia de Pedrógãou Grande, informaron a Efe fontes do Goberno.
Dianteiro do Friol
Daniel Roca Couso marcou un hat trick ante o Carballedo nun avultado marcador
17/abr./24
