A Real Federación Española de Fútbol sumouse ás condolencias polo falecemento do mozo de 18 anos mentres xogaba ao fútbol sala na Pobra do Brollón.
"O Presidente da RFEF, Luis Rubiales, e a Real Federación Española de Fútbol no seu conxunto desexan transmitir o seu máis sentido pésame aos familiares e achegados do xogador de fútbol sala Alejandro B.R.", informou a Federación nun comunicado oficial.
O mozo xogador pertencía ao Club Polideportivo Calasancio, e tras o suceso, o torneo de fútbol sala no que estaba a participar quedou suspendido. De momento descoñécense as causas do falecemento.