Evacuados os 370 alumnos do colexio Frei Luís por gretas en varias aulas

Os 370 alumnos do colexio Frei Luís de Granada de Sarria, así como os profesores, foron evacuados sobre as once da mañá de onte do centro ao descubrirse gretas en varias aulas. Éstas víronse por primeira vez en setembro, aínda que ao atopar onte novas fisuras decidiron levar aos nenos ao patio, onde permaneceron durante todo o día.

Os técnicos e os representantes do Goberno autonómico que visitaron onte o colexio acordaron apontoar a planta baixa na zona do patio (espazo que xa foi reforzado en parte) «por seguridade». Estes traballos desenvolveranse durante hoxe e mañá por unha empresa contratada pola Xunta, polo que se acordou suspender as clases nas dúas xornadas.

Os técnicos visitaron onte o inmoble, que foi construído fai 40 anos, e achacaron as gretas a unha «deformación do forxado polo paso do tempo», aínda que aclararon que non hai risco de rotura. «O forxado non ten nada que indique que vaia romper, non hai risco de colapso», aseguraron ante pais e profesores.

As gretas atópanse en varias aulas desde hai anos, aínda que ao parecer estas aumentaron no mes de setembro. Desde entón os técnicos colocaron testemuñas para coñecer a evolución das fisuras. Nos primeiros días deste mes apontoaron parte da planta baixa no patio e catro aulas. Éstas estaban ocupadas por alumnos de segundo e terceiro de Primaria, que foron reacollidos noutras clases. Ao mesmo tempo, os operarios iniciaron un estudo e realizaron catas para coñecer a estrutura do edificio «que non se correspondía ao proxecto da obra», sinalaron.

Os profesores acharon agora outras gretas, polo que alertaron novamente aos especialistas, quen propuxeron como medida de precaución que se desaloxase o colexio ata coñecer como se atopaba. Segundo os técnicos, ao ver que non había risco informaron de que podían volver ao edificio, aínda que os profesores decidiron permanecer no patio ata que efectuasen unha revisión completa ao inmoble.

A dirección do centro asegurou que o problema coincidiu xustamente cun simulacro de desaloxo que realizan todos os anos.

Na tarde de onte reuníronse no colexio a delegada da Xunta en Lugo, Raquel Arias; o xefe territorial de Educación, José Jesús Ramos Ledo; o alcalde sarrián, José Antonio García; o concelleiro de educación, Francisco Pérez; o inspectora xefe de zona, a inspectora do centro, técnicos e membros da dirección do Ceip.

A evacuación dos alumnos xerou gran preocupación entre os profesores, os nenos e os pais. Algúns dos proxenitores, ao coñecer a noticia, achegáronse pola mañá ata o centro para recoller aos seus fillos e reclamar unha explicación. As medidas que se tomarán para solucionar o problema foron explicadas por especialistas e autoridades durante outra reunión cos pais que permaneceron pola tarde no centro alarmados pola situación.