A primeira xornada de folga convocada polos sindicatos CIG e CUT para os sábados de outubro e novembro para denunciar as condicións laborais na planta de PSA en Vigo tivo un escaso seguimento, xa que a secundaron catro traballadores, informaron a Efe fontes da dirección.
Trátase de catro dos quince empregados que teñen a obrigación de acudir os sábados para compensar a bolsa de horas, e o resto, ata mil, asisten de forma voluntaria, detallaron as fontes.
Nin sequera se organizaron piquetes informativos, como si houbo na folga do pasado xullo, cando tamén apoiaba esta medida de presión o sindicato CC OO, iso a pesar de que CIG e CUT solicitaron permiso á Subdelegación do Goberno, que esta mañá montou un dispositivo policial.
Os outros dous sindicatos con representación no comité de empresa de PSA Vigo, o maioritario SIT e UGT, tamén se desmarcaron da convocatoria de folga.
As centrais convocantes falan de condicións laborais de "escravitude", pola sobrecarga de traballo que soporta un persoal que, segundo denuncian, no último ano perdeu trescentos postos indefinidos.
Ademais de como medida de presión, as centrais convocantes buscan coa folga dos sábados suprimir a sexta xornada laboral e así, quen teñan a obrigatoriedade de acudir, se non o fan, que non sexan penalizados.
Denuncian que ademais de melloras tecnolóxicas, a dirección debe ter en conta as condicións laborais, que nestes momentos están a derivar en "enfermidades profesionais", o que trasladaron á Consellería de Sanidade, o Instituto Nacional da Seguridade Social e ao Consello Galego de Relacións Laborais.
CIG e CUT lamentan que as administracións públicas "saben o que pasa" portas dentro en PSA Vigo e con todo "insisten en vendela como un modelo laboral", cando o que está a suceder é "unha regresión que non se coñece desde fai 40 ou 50 anos".
