O presidente turco, o islamita Recep Tayyip Erdogan, dixo este sábado que Holanda actúa con "remanentes nazis e fascistas", tras a decisión do Goberno neerlandés de prohibir a aterraxe do avión do ministro de Exteriores turco, Mevlüt Cavusolgu, quen ía participar nun mitin político en Róterdan.
"Podedes anular os voos do noso ministro de Exteriores todo o que queirades. Logo disto como virán os vosos avións a Turquía? Falo de diplomáticos, non dos cidadáns", dixo o presidente nun discurso en Istambul, informa a cadea NTV.
Erdogan acusara esta semana a Alemaña de nazismo en relación coa polémica ao redor dos mitins electorais nese país
"Holanda, podes saltar unha vez, dúas veces, pero debes saber que os nosos cidadáns romperán as túas conspiracións o 16 abril", dixo Erdogan en relación ao referendo constitucional que se celebra en Turquía o mes que vén. "(Holanda) fai toda a presión que queiras, alimenta no teu país aos terroristas que queiras, todo iso dirixirase contra vós", agregou o presidente turco.
O Goberno holandés denegou este sábado o permiso de aterraxe no seu territorio ao avión Çavusoglu, alegando que a súa presenza "levaría riscos para a orde pública e a seguridade".
Nun comunicado, o Executivo holandés explicou que han intentando buscar unha alternativa en conversacións coas autoridades turcas, pero que finalmente non tivo outra opción que prohibir a aterraxe.
Trátase dun novo capítulo na tensión diplomática entre os dous aliados da OTAN sobre o referendo promovido polo partido islamita de Desenvolvemento e Xustiza (AKP) para reformar a constitución e converter Turquía nunha república presidencialista.
Erdogan acusara esta semana a Alemaña de nazismo en relación coa polémica ao redor dos mitins electorais nese país de ministros turcos ante o referendo.
Çavusoglu dixo este sábado que Holanda lle ameazou con retirar o seu permiso para voar a Róterdan, onde tiña previsto intervir nun mitin no consulado turco e vaticinou "duras sancións" se se producía esa prohibición.
