Cando Vilarxubín e outros pobos do interior pontenovés parecían abocados ao despoboamento, do mesmo xeito que outras aldeas agora pantasmas da Ponteonova, como Ínsua, Labrada ou Gabeás, apareceu un home capaz de motivar á veciñanza para loitar polo que é seu e que non desapareza o encanto desta contorna rural. O fotógrafo cántabro Vicente Ansola non só rehabilitou unha vivenda en Vilaeimil, senón que publicou un libro con instantáneas sobre estes lugares que exporá tamén en galerías de todo o mundo.
Ansola vive dacabalo da súa Cantabria natal e da Pontenova desde fai algo máis de catro anos porque quedou prendado desta zona do interior mariñán. Tal é o seu compromiso con estes pobos que puxo a súa experiencia como fotógrafo ao servizo das xentes que habitan estas aldeas, retratando lugares e costumes, en instantáneas que quedaron recollidas no libro O Pobo das Néboas, publicado polo Concello pontenovés con fondos autonómicos para potenciar a reserva da biosfera do río Eo, Oscos e Terras de Burón.
Tres desas imaxes valéronlle o ser seleccionado, recentemente, entre os mellores fotógrafos do mundo polo prestixioso certame internacional de fotografía Hasselblad Masters de 2010. O premio contempla a exposición das fotos gañadoras en varias salas de todo o mundo, polo que A Pontenova coñecerase desde Tokio a Nova York.
Trasno
Ansola logrou motivar aos veciños destas aldeas case en perigo de extinción cun obxectivo claro: «Lograr que a Administración aplique algunha figura de protección para o patrimonio etnográfico da zona». Recorda, por iso, a consigna destes habitantes: «Vilarxubín, non imos deixarte morrer», porque «se estas aldeas desaparecen -continúa o fotógrafo- quen nos protexerá dos móbiles, do aparcadoiro limitado, dos mp3 e demais dispositivos de ruídos desagradables», pregúntase.
Para atraer visitantes ao interior pontenovés e reivindicar a súa protección, os veciños inventaron unha lenda ao redor da estatua dun trasgo ou trasno que o pasado domingo, o pobo enteiro colocou á entrada de Vilarxubín, localidade considerada «a capital da TDT, é dicir, do Triángulo dos Trasnos». A fábula reza que «fotografarse xunto ao trasno daralle sorte a aquel que o faga e permitiralle converterse noutro ser mitolóxico, cando a vida apáguese, polo que vivirá feliz para sempre nas fragas da TDT».
Película
O interior pontenovés, en concreto o da parroquia de Bogo e o da Casa do Figaldo en Machuco, tamén se divulgará grazas á estrea, o próximo día 9 na Coruña e o martes 21 en Madrid, da curtametraxe ‘Adiviña quen vén comer mañá', de Pepe Xordana, con actores como María Castro e Chete Lera.
