A conta atrás para a oitava edición do Resurrection Fest -1, 2 e 3 de agosto- xa está en marcha e, a falta de 19 días, a organización ten ben pechado cada detalle, incluído o cartel que integran finalmente 69 grupos, o maior número de todas as edicións.
A baixa de D.R.I., que cancelou a súa xira europea por enfermidade dun dos seus integrantes, supuxo un inconveniente para os organizadores pero pronto o liquidaron coa incorporación da banda hadcore punk escocesa The Exploited, que substituirá á anterior o venres. O último nome en sumarse ao amplo cartel é Your Demise, que inclúe o Resurrection na súa xira de despedida, xa que en 2014 deixan a música e este será o seu último concerto en España. Ambos os grupos teñen en Viveiro as súas únicas paradas en todo o país.
