Catro asaltos lle quedan ao Pescados Rubén Burela FS para finiquitar o 2016 no aspecto deportivo. O primeiro combate teno este sábado, a partir das 20.00 horas en Gran Canaria ante o equipo local, un recentemente ascendido que se fai forte no seu fortín insular. O mércores volverá repetir enfrontamento e escenario na Copa do Rei, para xogar o venres ante o Catgas Enerxía e despedirá o ano en 2016 en Vista Alegre ante o Aspil Vidal Ribeira Navarra o martes día 20 de decembro.
A laranxa mecánica buscará o seu cuarto triunfo consecutivo que lle reforce no feito nas últimas semanas. As vitorias ante Jumilla, Antequera e Peñíscola subiron nunha nube ao equipo de Daniel Ibañes, camiño da loita pola Copa de España, que está a catro puntos e difícil, pero non imposible.
"Imos a este partido con moita ilusión e con moitas ganas de xogar", di Daniel Ibañes, satisfeito cos resultados e o xogo dos últimos encontros. "Cando se gaña sempre se fai todo mellor, na clasificación melloramos bastante, e para seguir neste camiño a verdade é que unha vitoria este sábado deixaríanos nunha boa posición na táboa para afrontar o final da primeira volta", argumenta o técnico hispano brasileiro.
A clave
Ausencias: No conxunto mariñán non viaxaron Edu, Chano, Hélder, Renato e Carlitos
O dato
Fortaleza: Os canarios só perderon un partido dos catro que xogaron no seu feudo
Para o adestrador, o espello onde ten que mirarse os Pescados Rubén é no partido ante o Cartaxena. "Aí era cando necesitabamos gañar e gañamos, ademais facendo un gran partido", di.
RIVAL PERIGOSO. Sobre o rival, Daniel recoñece que é un recentemente ascendido "pero que foi capaz de gañar na súa casa ao Jaén e os partidos que perderon foron axustados, polo que en teoría será un encontro igualado", di, e apunta. "Se facemos un bo partido podémonos levar os tres puntos". E como? "Estando concentrados os corenta minutos, que é o que che esixe esta categoría en todos os partidos; se estamos enchufados todo o partido é difícil gañarnos", conclúe.
Un dos estandartes do equipo que aos poucos volve ser o de ante é Matamoros, que ve na Gran Canaria a un rival complicado, como o seu adestrador. "Serán dous partidos moi complicados, porque é unha cancha onde gañaron poucos equipos", apunta.
Matamoros, tras moitos meses afastado das canchas de xogo, volveu ao parqué sen, por agora, ningúns tropezóns en forma de recaída. "Estou moito mellor, aínda non é o meu mellor momento, pero me atopo moito máis rápido e facer goles, como ante o Jumilla, axúdame moito animicamente para seguir traballando e mellorando" di.
Para o á madrileño, unha vitoria sería moito máis que os tres puntos. "Unha vitoria significaría que podemos pensar en algo máis que a salvación; estamos con moitas ganas de seguir na boa dinámica".
Non viaxaron a este tour que lles levará de Gran Canaria a Santa Coloma Chano, Edu, Hélder, Renato e Carlitos. No conxunto local son baixas Gus e Jonathan Cámara, ambos por lesión.
