'Emigrante dun país soñado' expón unha visión transoceánica de Seoane

Unha visión transoceánica e compartida, integrando as perspectivas de expertos galegos e arxentinos. É a principal aportación de ‘Emigrante dun país soñado. Luis Seoane entre Galicia e Arxentina’, libro editado polo Consello da Cultura Galega (CCG) que recolle as actas dun congreso internacional sobre o intelectual celebrado en abril de 2010, e que foi presentado onte na galería Sargadelos de Lugo.

Asistiron ao acto o coordinador da obra e presidente do CCG, Ramón Villares, o poeta e profesor Claudio Rodríguez Fer e Benxamín Casal, presidente de Galaxia.

Para o historiador Ramón Villares, o libro presenta dúas novidades fundamentais. A primeira delas sería, precisamente, esa visión integradora. «O libro expón unha mirada compartida sobre Seoane, entre galegos e arxentinos. El sempre fixo referencia a que tiña dúas raíces, e o título do libro atende a iso, a esa doble cidadanía e ao feito de soñar cunha terra, tela sempre en mente, cando se reside noutra», explicou.

A segunda aportación é facer fincapé na figura de Seoane como intelectual, «unha faceta del que quedou quizáis nun segundo plano, sendo máis coñecido como artista, cando foi, a nivel global, un pensador sistemático, coherente e comprometido con devolver a Galicia o seu patrimonio cultural. Sen dúbida, un dos máis importantes e influíntes dos galegos no exilio», aseverou Villares.

«Foi un ideólogo cun proxecto cultural para modernizar Galicia, para trasladar a cultura ao pobo. Todo iso que temos agora, a posibilidade de ir aos teatros, ao cine, el tíñao na cabeza dun xeito utópico, soñaba con ese ideal socialdemócrata», expresou o editor do libro.

Villares referiuse tamén á visión que teñen de Seoane na súa outra terra, a arxentina. «Alí é considerado, sobre todo como muralista, aspecto que aquí tamén é un pouco descoñecido. No teatro San Martín, na Avenida Corrientes de Bos Aires, pode apreciarse a súa pegada», afirmou.

Rodríguez Fer quixo expresar a súa «sintonía, tanto persoal como ideolóxica», por Seoane e centrou a súa intervención na conexión do intelectual con Lugo.

Figura poliédrica

Benxamín Casal Vila, pola súa banda, coincidiu en resaltar o carácter «poliédrico» de Seoane, un «dinamizador cultural de primeira orde» nas súas múltiples facetas, como ensaísta, pintor, deseñador e colaborador de Isaac Díaz Pardo na súa aventura empresarial en Sargadelos.

Casal Vila definiu a Luis Seoane como «unha ponte entre a cultura galega» en referencia ós seus anos no exilio. «Foi dos primeiros en chegar, no ano 36, e dende alí foi acollendo aos que viñeron despois, preparando un movemento de modernización da nosa cultura que se viu un pouco abaixo coa consolidación do franquismo», expresou.