O tramo da A-6 no municipio leonés de Trabadelo, no límite con Lugo, que estaba cortado desde o 20 de febreiro do pasado ano, será aberto ao tráfico o próximo día 18, logo da execución dunhas complicadas obras de reparación e estabilización da ladeira, cun investimento de 34,7 millóns de euros.
O Ministerio de Fomento tivo que actuar tras un desprendemento de terra, que afectou á calzada da autovía no seu quilómetro 418, en dirección á Coruña.
Para estabilizar a ladeira, previamente foi necesario afianzala, evitando que continuasen os desprendementos e que se vise afectada unha liña de alta tensión.
Unha vez consolidado o terreo foi necesario abrir doce quilómetros de camiños para acceder ás distintas zonas nas que se traballou. Comezaron entón os traballos de reparación, descabezando o noiro en bancadas de cinco metros, que foron reforzadas e estabilizadas con distintos sistemas de sostemento e drenaxe.
Foi necesario escavar e retirar 510.000 metros cúbicos de material, efectuar traballos de sostemento nos que se empregaron 6.200 metros cúbicos de formigón proxectado, 85.000 metros cadrados de mallazo para tratar o noiro. Tamén se instalaron 21.500 metros de drenes horizontais e executáronse 2.150 metros cadrados de moitos ancorados, con 12.300 metros de ancoraxes activas tensados a 120 toneladas.
Por outra banda, na calzada procedeuse á colocación dunha estrutura porticada de protección tipo pérgola, de 3.570 metros cadrados, prolongando o túnel existente, coa intención de evitar incidentes no futuro.
Fomento tamén se ocupou da rexeneración ambiental das áreas nas que se depositou o excedente de terra sobrante das obras.
Por outra banda, o noiro dispón agora dun sistema de control, que permite comprobar vía telemática os parámetros de seguridade na zona.
Durante a execución das obras de estabilización da ladeira primouse o criterio da seguridade dos propios traballadores. No transcurso da execución do proxecto non se rexistrou ningunha incidencia laboral, a pesar de que nos traballos participou abundante maquinaria pesada que traballou en grandes alturas e con moi pouco espazo para efectuar manobras.
- 50 obreiros que traballaron as 24 horas do día. Reabrir ao tráfico o tramo da A-6 pechado en Trabadelo levou a Fomento 16 meses, a pesar de que nos traballos participaron 50 obreiros, que, en quendas de oito horas, mantiveron a actividade ininterrompidamente durante as vinte e catro horas do día.
- Maquinaria. No proxecto participaron tres grandes retroescavadoras e doce camións articulados de tracción total, que se desprazaron por camiños cunha pendente superior ao 25%. Para a execución dos sostementos e drenaxes traballaron catro carros perforadores, dous gunitadoras para o formigón proxectado e dous guindastres telescópicas.
