O segundo corte ao tráfico da estrada LU-540, que une Viveiro con Cabreiros terá unha duración de tres días, desde o luns ás 7.30 horas da mañá, ata a noite do mércores. O inspector principal da policía local, Juan Manuel Escudeiro, puntualiza que «en principio o corte está previsto ata as 22.00 ou 23.00 horas do mércores, pero depende do avance das obras».
Escudeiro sinala que a planificación dos desvíos da circulación que se porá en marcha é «igual ao do primeiro corte». A novidade radica no incremento de paneis informativos con indicadores de frechas e direccións nas cruces, para evitar que os condutores que descoñezan a situación despístense, como ocorreu a primeira vez.
O itinerario de acceso á cidade partirá uns metros antes de chegar á ponte de Landrove, onde os vehículos terán que desviarse polas estradas de Galdo e Vieiro. A rotonda do Ecce Homo, convértese así no punto de entrada e saída da cidade cara a Lugo. Este é o sistema fixado para a entrada, pero a saída deberá facerse polo Camiño Vello.
A policía local non descarta volver colocar o rádar móbil na estrada de Vieiro a Galdo. «Solicitamos a colaboración cidadá para que as xornadas transcorran sen incidencias», requiriu o inspector principal.
Esta segunda fase do proxecto é a de maior envergadura. Demolerase o taboleiro ao lado norte e o muro situado baixo a ponte na marxe dereita, visto en dirección á saída da cidade. O muro do outro lado non se pode derrubar porque o propietario do dique non deu autorización ao Concello. Polo tanto, o terreo para ampliar as beirarrúas gañarase só no outro marxe. Os carriis da calzada terán 3,50 metros e as beiravías 0,50. O gálibo alcanzará os 5,40 metros.
