A deputada socialista no Parlamento valenciano Cristina Moreno esixiu ao presidente da Generalitat, Alberto Fabra, que vote a favor de crear unha comisión de investigación na Cámara sobre a xestión en Caja de Ahorros del Mediterráneo (CAM).
Nun comunicado, a tamén secretaria de Economía e Emprego do PSPV-PSOE mostrouse "escandalizada" tras coñecer que a Fiscalía Anticorrupción decidiu investigar a ex directora xeral de CAM María Dolores Amorós ante a posibilidade de que incorra nun delito penal.
Moreno solicitou que os tribunais "investiguen a fondo, sen distincións nin excepcións, a todos cantos tiveron algún tipo de responsabilidade na ineficaz, irresponsable e nefasta xestión da caixa alacantina".
Segundo a socialista, "cada día é máis urxente que Fabra dea explicacións porque é evidente que, máis aló das responsabilidades xurídicas, existen obvias responsabilidades políticas".
Recomendou ao presidente valenciano que "faga o que o seu partido xa fixo en Galicia", onde se creará unha comisión para investigar a xestión das caixas galegas, "co voto" do presidente da Xunta, Alberto Núñez Feijóo.
Moreno considera que se Fabra non actúa do mesmo xeito, "estará a demostrar que nada cambiou no PPCV, que se guía só polo escurantismo, a opacidade e o engano"
Xogador do Folgueiro
Óscar Pérez Meitín marcou de penalti e no desconto para lograr a vitoria
21/abr./24
