O orzamento de Educación sobe un 9,3% e achega á Lomce 363 millóns de euros

O Goberno prevé destinar ao programa de bolsas e axudas a estudantes o 59,3% do total das contas públicas educativas, cunha dotación de 1.472,40 millóns

O proxecto de orzamento do Estado para Educación en 2016 sobe un 9,3% respecto de 2015 para chegar ata os 2.483,96 millóns de euros, dos que 363,03 millóns serán destinados a financiar a implantación da Lomce o próximo curso.

Para 2016, o Goberno prevé destinar ao programa de bolsas e axudas a estudantes o 59,3% do total dos orzamentos educativos, cunha dotación de 1.472,40 millóns de euros (o pasado ano foi de 1.469,6 millóns).

Segundo o documento 'Presentación del proxecto de Presupuestos Generales del Estado (PGE) 2016' nestes orzamentos "consolídase o esforzo realizado nos últimos anos, e que a dotación para o sistema de bolsas e axudas de carácter xeral incrementouse en 248,29 millóns de euros desde o exercicio 2011, alcanzándose en 2016 a dotación máis alta da serie histórica"

Para a implantación da Lomce resérvanse 363,03 millóns para financiar os novos ciclos de Formación Profesional Básica e a anticipación da elección e novos itinerarios nos cursos terceiro e cuarto da Educación Secundaria Obrigatoria.

Ademais, transfírense ás comunidades autónomas 24 millóns de euros co obxectivo de axudar as familias a sufragar os gastos de adaptación "do material didáctico" aos novos currículos establecidos pola Lomce.

Comentarios