O presidente do Barcelona dimite para optar á reelección

O presidente do Barcelona, Josep Maria Bartomeu, presentou a dimisión esta noite, xunto á maioría dos seus directivos, para optar á reelección nas eleccións á presidencia que se celebrarán en xullo, informou o club.

Con esta dimisión en grupo, tras a última reunión da xunta celebrada esta tarde noite no Camp Nou, o Barcelona pon en marcha a comisión xestora, presidida por Ramón Adell, que á súa vez é o presidente da comisión económica da entidade.

Nesta xunta xestora tamén entrarán catro directivos: Javier Faus, Ramon Pont, Joan Bladé e Josep Ramón Vidal-Abarca.

Esta xunta xestora será a encargada nos próximos días de, como estipulan os estatutos, organizar o calendario electoral que deberá levar aos socios do Barcelona a elixir presidente e nova xunta para as seis próximas tempadas nunha votación que se celebrará entre mediados e finais de xullo.