O petroleiro secuestrado non tiña seguridade a bordo, segundo a empresa propietaria

A portavoz da naviera, Sheena Campbell, explicou a Efe que non ten ningún dato concreto porque non están en contacto co barco, "como é típico nesta situación", aínda que asegurou que a compañía cre que toda a tripulación está ben "polas circunstancias do secuestro".

O petroleiro chámase Matheos I, de 183 metros de eslora, foi construído en 2004, ten bandeira chipriota e a bordo viaxan vinte e tres tripulantes, cinco deles españois procedentes de distintas comunidades autónomas, segundo a compañía.

Campbell argumentou que nesta zona de África hai tan só dúas semanas produciuse un secuestro similar e que foi máis un roubo porque o que "normalmente queren os piratas é a carga".

"Deste caso non sabemos nada e esperemos que acabe ben", engadiu Campbell, quen fixo fincapé en que neste tipo de situacións os piratas "tardan dous ou tres días en descargar a carga, rouban o que poden e deixan ir á tripulación e ao buque".

A portavoz sinalou que "non hai garantías de que isto é o que pasará esta vez, pero temos esperanza" á vista dos exemplos precedentes.

A compañía recordou que a zona onde se produciu o secuestro, o Golfo de Guinea, é "menos conflitiva" que Somalia, polo que o Matheos I, que no momento do secuestro trasladaba a carga (petróleo) dun buque a outro, non levaba seguridade privada.

Campbell indicou que agora hai que esperar e falar lentamente cos interesados, todos os implicados neste caso, "con extrema confidencialidade para non pór en perigo a seguridade da tripulación e do barco".

Comentarios