O pai Pajares pasa a súa primeira noite no hospital Carlos III

Miguel Pajares, infectado polo virus do ébola en Liberia e a monxa de orixe guineana e pasaporte español, Juliana Bonoha Bohé, pasaron a súa primeira noite no hospital Carlos III de Madrid onde ingresaron onte tras ser repatriados desde Liberia.

Cando se cumpren 24 horas desde a súa chegada a Madrid, segundo o último parte médico, facilitado onte, o relixioso, de 75 anos, atopábase en bo estado, estable e febril, con respiración espontánea e sen hemorraxias.

A irmá Juliana, que deu negativo na proba do ébola, presenta "moi bo estado xeral", aínda que ten febres tifoideas.

Esta mañá está previsto que a Orde Hospitalaria de San Juan de Deus (OHSJD), á que pertencen os relixiosos, informe nunha rolda de prensa sobre as novidades ao redor da saúde dos dous repatriados.

Exporá tamén a prioridade de lograr un dispositivo sanitario no hospital San José de Monrovia, co fin de atender adecuadamente ás outras cinco persoas que seguen alí. Pronunciarase ademais sobre os compromisos que asumirá a institución en canto ao custo de repatriación desde o hospital de Monrovia ata o Carlos III de Madrid, como requiriu o Goberno.

Os pacientes están na planta sexta do centro hospitalario, completamente illados, asistidos e controlados por dous médicos internistas e intensivistas, catro enfermeiras e catro auxiliares por quenda, e persoal de apoio.

A citada planta está sometida a fortes controis e os médicos e persoal sanitario que os atenden visten traxes de protección completa para evitar contacto con calquera fluído ou secreción dos pacientes.

Tras un complexo operativo de repatriación, os dous relixiosos chegaron onte á capital española ás 8.15 da mañá nun avión do Exército preparado con todas as medidas médicas e de seguridade para evitar contaxios entre a tripulación e o persoal médico.

O Goberno español fíxose cargo nun principio dos gastos de repatriación que, segundo explicou onte a directora xeral de Saúde Pública, Mercedes Vinuesa, poderían ser asumidos pola Orde do relixioso.