O aeroporto de Vigo rexistrou en agosto un aumento do 10,3% do número de pasaxeiros en agosto, respecto ao mesmo período do ano anterior, o da Coruña 5,5% e o de Santiago de Compostela perdeu, en cambio, un 1,9%, segundo datos divulgados este martes pola firma Aena.
O aeródromo vigués de Peinador tivo un total de 112.718 pasaxeiros en agosto, dos cales 91.855 de traxectos en España, e 1.324 voos, un 2,6% máis que no mesmo mes do ano anterior.
Así mesmo, o seu terminal de carga tivo 44 toneladas de mercancía, o que representa un crecemento do 43%, sinala Aena.
Pola súa banda, o coruñés de Alvedro tivo 97.792 pasaxeiros, dos cales 83.633 de traxectos no interior de España, nun total de 1.441 voos, ademais de 14 toneladas de mercancía, un aumento de 11,2%, segundo Aena.
O aeroporto compostelán Rosalía de Castro-Lavacolla, que mantén o liderado, rexistrou 271.508 pasaxeiros, aínda que perdeu 1,9% respecto de agosto de 2016, e tivo 2.161 voos, dos cales 1.372 con distintos puntos de España e 537 con outras cidades de Europa.
O seu terminal de carga manexou o mes pasado máis de 220 toneladas de mercancía, un 25,2% máis que en agosto de 2016.
Desde principios de ano o aeroporto compostelán rexistra 1.781.445 pasaxeiros (4,9% máis que o mesmo período do ano anterior) e 1.714 toneladas de carga (19,7% máis).
O de Vigo contabiliza 709.989 pasaxeiros nos últimos oito meses (10,1% máis que no mesmo período de 2016) e unhas 350 toneladas de carga, mentres que o da Coruña tivo 753.305 pasaxeiros (8,2% máis) e máis de 110 toneladas de mercancía.
