O mosteiro de Samos habilitou un novo espazo destinado á realización de convivencias por parte de grupos numerosos, aos que se ofrece a posibilidade de pasar a noite na abadía e participar da vida monástica.
Esta actividade do mosteiro, que encabeza o prior, José Luís Vélez, está dirixida a grupos que se atopan realizando o Camiño de Santiago, asociacións, entidades que desexan levar a cabo un retiro e familias. Nela poden participar tanto novos como maiores, homes e mulleres. «É un servizo de convivencias máis enfocado á xente que non vén pasar só unha noite como fan os peregrinos no albergue. Queremos darlle un toque máis espiritual, un novo enfoque», explicou o encargado da actividade.
As convivencias realízanse no espazo que antes estaba destinado ao noviciado, que foi acondicionado. Os grupos que durman na abadía máis dunha noite tamén disporán de máis salas nas que poder desenvolver as convivencias. Estes encontros poden prolongarse o tempo que desexen os asistentes, aínda que ata agora os grupos que visitaron o mosteiro só desenvolvéronos entre dous e tres días.
