A Denominación de Orixe de Ribeira Sacra conta cunhas 2.000 hectáreas de viñedo que, por exemplo, na última vendima, produciron 7,1 millóns de quilogramos de uva. Con todo, para unha denominación emerxente a produción aínda non é suficiente para abastecer a demanda do mercado e son moitas as adegas que optan por facer novas plantacións ou recuperar viñedos abandonados.
O caso máis significativo é o de Reitoral de Amandi, que ten en marcha unha plantación en Campos de Vila (Quiroga) que rolda as 50 hectáreas de terreo. A adega, a máis grande da denominación, vende tres millóns de litros de viño ao ano e a idea é que os novos terreos permítanlle ir aumentando gradualmente esa cifra.
Outra adega que aposta firmemente por ampliar viñedo é Abadía da Cova (O Saviñao). Segundo un dos seus propietarios, Evaristo Rodríguez, nos últimos dous anos, adecuaron seis hectáreas de viñedo en terreos abandonados e a adega comprou outras dúas hectáreas en produción.
