O FMI afirma que o sistema bancario español é ''un dos máis fortes de Europa''

O Fondo Monetario Internacional (FMI) asegurou hoxe que o sistema bancario español é "un dos máis fortes de Europa", e reiterou os progresos realizados dentro da reforma financeira de España.

"O sistema bancario atópase entre os máis fortes de Europa", afirmou William Murray, portavoz adxunto da institución internacional en rolda de prensa ante as preguntas de se as perdas anunciadas por Bankia de máis de 19.000 millóns de euros (uns 25.000 millóns de dólares) poderían afectar á estabilidade financeira do país.

O portavoz do Fondo explicou que "cando facemos as avaliacións do sistema bancario dun país non examinamos unha entidade en concreto, senón ao propio sistema en conxunto".

Os técnicos do FMI, que visitaron por segunda vez España a finais de xaneiro para supervisar a aplicación do plan de rescate do sector financeiro, destacaron ao termo da súa avaliación os "grandes progresos", aínda que alertaron sobre riscos continuados na economía española.

Entre as súas recomendacións, o Fondo pediu ao "banco malo", ou Sareb, que presente un plan de negocios "amplo e actualizado", e ao Banco de España que se fixe un calendario para o seu novo plan de supervisión.

Ademais, solicitou ao Goberno español que aplique os incentivos para que as caixas se desprendan da súa posición de control nos bancos.

O FMI comprometeuse en xullo de 2012 ante a Comisión Europea a supervisar de xeito independente as reformas financeiras que debían acompañar o rescate bancario, ao que se destinaron uns 44.000 millóns de euros.

O obxectivo, o crédito
Pola súa banda, o vicepresidente da Comisión Europea (CE) e responsable de Asuntos Económicos e Monetarios, Olli Rehn, afirmou hoxe que o sistema financeiro español debe aumentar o fluxo de crédito para estimular o crecemento.

"Mentres que Estados Unidos procedeu a unha ampla reparación do sistema financeiro entre 2008 e 2009, algo que resultou crucial para a súa recuperación, ese proceso acometeuse só parcialmente en Europa, o que supón un lastre importante", sostivo Rehn.