O fiscal Anticorrupción Pedro Horrach asegurou hoxe que recorrerá o auto do xuíz José Castro "porque segue sen existir ningún elemento en contra" da infanta Cristina.
Horrach manifestouse así poucos minutos antes de que fose dado a coñecer o auto do xuíz Castro que mantén a imputación da infanta por supostos delitos fiscais e de branqueo. No mesmo auto o xuíz instrutor considera que a infanta debería ser xulgada xunto co seu esposo, Iñaki Urdangarin, e o resto de imputados na suposta trama de corrupción.
O fiscal, quen matizou que a esa hora non recibira o auto, apuntou á prensa ao acceder ao edificio da fiscalía que durante os catro anos de instrución "simplemente tiven esa discrepancia co xuíz Castro respecto deste caso". Engadiu o fiscal sobre a súa relación co xuíz instrutor do caso Noós que, "globalmente, fomos da man" e negou que a defensa de Urdangarin solicite un acordo co ministerio fiscal para evitar ir a xuízo.
