O FBI e o NORAD elevan o nivel de alerta en todas as súas oficinas e Obama ofrece asistencia a Canadá

O FBI ordenou que se eleve o nivel de alerta en todas as súas oficinas, do mesmo xeito que no Comando de Defensa Aeroespacial Norteamericano (NORAD, pola súa sigla en inglés), tras o ataque rexistrado hoxe no Parlamento de Canadá, en Ottawa.

"O NORAD está a dar todos os pasos apropiados e prudentes para estar en condicións adecuadas de responder rapidamente a calquera incidente que afecte á aviación en Canadá", afirmou o Comando na súa conta oficial da rede social Twitter.

O NORAD é un comando conxunto de defensa aérea dos Estados Unidos e Canadá, con sede en Colorado, nos EE UU, dedicado a ofrecer protección sobre o espazo aéreo de ambos os países. Así mesmo, o FBI está a traballar coas axencias de seguridade canadenses na investigación do suceso e ordenou que as súas oficinas aumenten o seu nivel de alerta, de acordo coa CNN.

A Embaixada de Canadá en Washington, situada cerca do Capitolio en Washington, pechou as súas instalacións, segundo anunciou a legación na súa conta oficial de Twitter.

O Goberno dos EE UU ofrece asistencia sen reservas a Canadá. O propio presidente Barack Obama xa falou por teléfono co primeiro ministro canadense, Stephen Harper, segundo a Casa Branca.

O portavoz da Casa Branca, Josh Earnest, afirmou na súa rolda de prensa diaria que é moi pronto para afirmar se os EE UU consideran o ataque un acto terrorista, dado que a información sobre o sucedido é "aínda incompleta".

Segundo Earnest, funcionarios estadounidenses están en contacto cos seus pares canadenses e ofreceron asistencia, se é necesario, para lidar co caos e a confusión que se están vivindo en Ottawa.

Ademais, Obama, quen foi informado do ocorrido en Ottawa pola súa asesora para seguridade e loita antiterrorista, Lisa Monaco, falou por teléfono con Harper, pero os detalles da conversación aínda non se coñecen.