A primeira sondaxe electoral do CIS realizado tras a reelección de Pedro Sánchez consolida o PSOE como segunda forza cun 24,9 % dos votos, 5 puntos máis que en abril e a só 4 do PP, que mantén o primeiro posto pero perde 3 puntos e queda no seu nivel máis baixo desde as eleccións.
A enquisa do Centro de Investigacións Sociolóxicas, feita pública hoxe, realizouse entre os días 1 e 10 de xullo e é a primeira con estimación de voto desde o retorno de Sánchez á Secretaría Xeral do PSOE e tras os debates das erradas mocións de censura de Podemos contra Mariano Rajoy no Congreso e contra Cristina Cifuentes en Madrid.
Segundo os datos do barómetro, se hoxe se celebrasen eleccións, o PP gañaría os comicios cun 28,8 por cento dos votos, aínda que perde case tres puntos respecto de abril, cando obtiña un 31,5.
O PSOE acurtaría a súa distancia cos populares cun 24,9 por cento dos sufraxios, cinco puntos máis que en abril e catro máis que Unidos Podemos e as súas confluencias que, aínda que subirían seis décimas, quedarían cun 20,3 por cento.
Son significativos tamén os datos do voto directo, xa que segundo ese cálculo sen a estimación do CIS, o PSOE adianta xa ao PP e obtería un 19,1 por cento -case seis puntos máis que en abril- fronte ao Partido Popular, que perde punto e medio, e quedaría no 17,1 por cento.
Na estimación de voto de xullo, Ciudadanos perde catro décimas desde a última enquisa electoral do CIS e obtería un 14,5 por cento.
A cuarta forza política sería ERC, que mantén unha previsión de apoio electoral do 2,9 por cento; mentres que o PdeCAT segue baixando e pasa do 2 por cento de abril ao 1,7 en xullo.
O PNV manteríase practicamente inalterable cun 1 por cento dos votos, seguido de EH-Bildu que perde tres décimas ata un 0,8, e pecha a lista Coalición Canaria (CC) cun 0,4 por cento -unha décima máis que en abril-.
Dentro do grupo de Unidos Podemos e as súas confluencias, a candidatura que máis sobe é a da formación morada xunto a IU, que crece case un punto ata o 12,8. En Comù Podem mantense cun 3,7 por cento.
Con todo, Compromìs perde tres décimas ata situarse no 2,6 por cento e En Marea mantén as súas expectativas electorais en 1,2 por cento.
