O Deportivo de Oltra arrincará o 12 de xullo en Abegondo e trasladarase a Vilalba na segunda semana

O Deportivo de José Luís Oltra, á fronte do banco desde o pasado domingo, arrincará a pretemporada o 12 de xullo e concentrarase na localidade lucense de Vilalba, onde o equipo coruñés quedou ano tras ano na súa etapa máis dourada, a do Superdépor.

O costume perdeuse con Joaquín Caparrós primeiro e con Miguel Ángel Lotina, despois, aínda que co vasco concentrouse alí na tempada 2007-08, a primeira na que estivo aos mandos do Deportivo.

O seu substituto no banco confirmou este martes que o equipo coruñés preparará desde o 12 de xullo o obxectivo da tempada 2011-12: ascender a Primeira División despois do descenso que sufriu na última xornada deste curso.

"Imos empezar o 12 de xullo coas revisións e o primeiro adestramento será probablemente pola tarde", adiantou Oltra na súa comparecencia ante os medios de comunicación no estadio de Riazor.

O técnico levantino explicou que a primeira semana da pretemporada será na cidade deportiva de Abegondo, que lle deixou "magníficas" impresións, e o persoal desprazarase a Vilalba, a unha hora da Coruña, a segunda semana.

"Gustoume o campo, o clima, o hotel e un pouco todo", comentou Oltra sobre a localidade lucense, á que acudiu na tarde do luns.

Matizou o novo técnico deportivista que non é "moi amante das concentracións", pero indicou que "algunhas son necesarias ou imprescindibles".

"A primeira semana considerámola de adaptación para que se axusten os futbolistas que cheguen porque non me gusta chegar e irnos. Na segunda semana, a parte da convivencia, hai que marcar pautas e apertar en canto a carga e é importante ter o descanso necesario e a alimentación correcta", advertiu.

José Luís Oltra sinalou que a súa idea é xogar en Vilalba o primeiro partido da pretemporada ante o Racing Vilalbés, que loitou esta tempada por ascender a Segunda B, e apuntou que a súa intención é evitar xiras e viaxes longas.

"Como premisa, imos intentar non facer desprazamentos. Se cadra logo hai que ir por compromiso do club ou porque é un rival importante, pero unha das premisas é non viaxar porque quítache tempo de traballo e descanso. Canto menos tempo perdamos, mellor", dixo.