O recinto feiral de Gontán, no municipio de Abadín, acollerá mañá a tradicional Feira de Santos, na que se espera a asistencia de decenas de gandeiros procedentes das provincias da Coruña, Lugo e Asturias, e máis dun centenar de postos de venda ambulante. O Concello de Abadín, organizador desta cita, repartirá 700 euros en premios entre os mellores exemplares de gando que acudan a feira.
A organización estableceu nesta edición sete categorías no concurso de gando e cada unha está dotada cun cheque de 100 euros. Desta forma, haberá premios para os mellores exemplares e cativa nos apartados equino e bovino, así como para os gandeiros que leven o maior número de cabalos e de bovinos. Tamén se premiará ao mellor exemplar equino de cadeira.
A recepción do gando no recinto feiral farase desde primeira hora da mañá, pero a inscrición das reses para participar no concurso que promove o Concello debe facerse ás 12.00 horas. O xurado examinará o gando e dará a coñecer o seu veredicto ás 14.00 horas, que é o momento previsto para realizar a entrega de premios por parte das autoridades.
O programa da Feira de Santos de Gontán completarase, como vén sendo habitual nos últimos anos, coa actuación dunha orquestra a partir das 22.00 horas.
Ésta será a primeira edición desta tradicional feira tras a última remodelación do recinto feiral. Os visitantes poderán atopar nel multitude de postos con ofertas en grao sumo variadas, desde produtos típicos da comarca ata roupa e calzado, pasando por accesorios de todo tipo para montar dacabalo. Tampouco faltarán os vendedores de produtos propios da época, como as noces e, sobre todo, as castañas, nin as casetas para degustar o polbo ou o churrasco.
