O BNG do Valadouro presentará unha moción no Concello, na que insta o rexedor, José Manuel Lamela, do Partido Popular, a reclamar da Consellería de Educación unha marcha atrás na idea de eliminar un profesor no colexio público de Ferreira mediante unha entrevista co responsable autonómico desta materia, Jesús Vázquez.
O edil nacionalista, Eduardo Chao, cre que a eliminación dunha praza de profesor no centro «redundará nunha diminución da calidade do ensino e nunha peor atención para os alumnos», pois ao descenso de docentes previsto para o próximo curso escolar hai que sumar «as reduccións de mestres que se viñeron producindo en anos pasados», co que entende que «os nenos de O Valadouro non terán as mesmas oportunidades que os que residen noutros concellos».
O edil nacionalista culpa desta situación directamente á Xunta, á que acusa de converter aos veciños do Valadouro «en cidadáns de segunda» e á que pide que «non sexan os nenos os que paguen a crise económica que se está a atravesar» e que desista das súas intencións de reducir o persoal de profesores.
Gardería
Seguindo co tema do ensino, Chao reclama tamén melloras na gardería da localidade. Neste sentido pide que se substitúa o servizo de cátering por un servizo de cociña propio, «aproveitando as instalacións xa existentes» no centro para unha mellor atención aos alumnos.
