O servizo municipal de auga, xestionado pola empresa Aqualia, aínda non localizou toda as fugas de gasóleo que cre existen na contorna do cruzamento das rúas Doutor Casares, San Pedro e rolda María Emilia Casas de Monforte. Estas verteduras xeran desde hai dúas semanas as protestas dos numerosos veciños que hai na zona, dado que en boa parte das vivendas percíbese un desagradable e intenso cheiro a combustible.
Ata o momento foi localizada unha fuga de gasóleo de calefacción dun depósito do Instituto de Educación Secundaria Río Cabe, emprazado na parte central da Rúa San Pedro. A veciñanza pide «maior dilixencia» na adopción de medidas e a limpeza dos colectores. No entanto, o alcalde, Severino Rodríguez, descarta realizar ese labor ata que se detecten todas as verteduras, pois asegurou que a empresa Aqualia considera que hai máis focos que o localizado no instituto.