O autor do atropelo múltiple de Nova York levaba semanas preparando o ataque

O presunto autor do atentado terrorista deste martes en Nova York, o uzbeco Sayfullo Saipov, de 29 anos, levaba varias semanas preparando o ataque e seguiu "con exactitude" instrucións do Estado Islámico (EI) distribuídas en redes sociais, segundo informaron este mércores fontes oficiais. O ataque está considerado como o peor que sofre a cidade desde os atentados terroristas do 11 de setembro de 2001.

No atropelo múltiple morreron oito persoas, cinco delas de nacionalidade arxentina, e outras doce resultaron feridas. Catro dos lesionados están en estado crítico, aínda que en condición estable.

Nunha rolda de prensa, autoridades da Policía de Nova York identificaron por primeira vez publicamente ao autor do atentado como Safyullo Saipov, de nacionalidade uzbeka, que chegou a Estados Unidos en marzo de 2010. O alcalde de Nova York, Bill de Blasio, que asistiu á rolda de prensa, xunto co gobernador do estado, Andrew Cuomo, e autoridades policiais, cualificou o ataque como un "acto covarde", pero dixo que non logrou interromper o ritmo normal da cidade. "O terrorismo non nos vai cambiar", agregou o rexedor.

Saipov, segundo a información facilitada, alugou a camioneta que utilizou para perpetrar o atentado unha hora antes do atropelo múltiple, en Nova Jersey, estado veciño a Nova York e no que vivía. Os xefes policiais que participaron na rolda de prensa non facilitaron detalles sobre as investigacións, pero confirmaron que a documentación atopada demostra que actuou "en nome" do EI.

"Seguiu exactamente as indicacións do EI en redes sociais nas que se dá instrucións aos seus seguidores", afirmou o subjefe da Policía de Nova York e encargado das accións contra o terrorismo, John Miller.

O presunto autor do atentado foi ferido o abdome por disparos dun policía que se presentou no lugar, e está baixo vixilancia nun hospital de Nova York. Xa foi interrogado polos investigadores, pero non se revelou nada nese sentido.

As autoridades dixeron que como parte das investigacións están a seguirse os últimos pasos do presunto terrorista para coñecer, entre outras cousas, con quen se comunicaba e o contido desas conversacións.