O Atlético queda sen Diego Costa... de momento

O Cholo Simeone vai ter que esperar para cumprir o seu vello desexo de ver a Diego Costa novamente de branquivermello. Polo menos iso se desprende da información publicada este mércores no diario Marca, na que se afirma que o traspaso do dianteiro ao Atlético de Madrid non se fará en ningún caso antes do próximo 1 de setembro, data na que finaliza o mercado estival de fichaxes.

A pesar da boa predisposición das dúas partes –xogador e Atlético–, para que as negociacións chegasen a bo porto, a negativa do Chelsea a negociar por un xogador que se negou a presentarse xunto aos seus compañeiros no inicio da pretemporada fixo que o club colchoneiro se reformule a súa estratexia e comece a fixarse no próximo mercado de traspasos.

Ademais, a prohibición de inscribir xogadores ata xaneiro de 2018 que pesa sobre o Atlético foi un factor decisivo para que desde Madrid non tensasen máis a corda do debido, pois en ningún caso Costa podería enfundarse a casaca branquivermella ata esa data.

Segundo informa Marca a esperanza do Atlético está agora mesmo en convencer ao xogador para que se presente en Londres e desbloquear así a situación. O Chelsea non quere deixar escapar a un futbolista que se declarou en rebeldía con tanto descaro, por moito que Diego Costa teña razón en estar enfadado –o seu adestrador, Antonio Conte, comunicoulle que non contaba con el mediante unha mensaxe de móbil e enviouno a adestrar co equipo filial–.